احلم تعيش 2 ازاى ؟؟

ازاى تحلم ؟
ده كان السؤال اللى انتهينا عنده المرة اللى فاتت

و طبعا يا جماعة الاجابة عن السؤال ده مش نموذج محدد و لكن فى بعض الوسائل و الأفكار اللى لازم تتضمنها أحلامنا
أولا :
طبعا احنا سمعنا كتيييييييييييييييييير انهم يقولوا السعادة مش بالمال .. كذلك النجاح مش بس فى الشغل مش بس شهرة مش بس حب الناس لى
و علشان يكون الموضوع موضح أكتر خلونا نتعرف على أركان الاتزان أو جوانب النجاح :
1- الركن الشخصى :
و ده فيه نجاح جسمى يعنى الواحد يكون محافظ على صحته و ده طبعا شىء بديهى إننا لو عملنا المعجزات و لكن صحتنا تعبانة هاتفضل عيشتنا غير سوية و كمان مش هانقدر ننجز كويس بسبب المتاعب الصحية .
و فيه نجاح روحانى .. و ده اللى بيكون بالشعائر الدينية و المشاعر الدينية كالإيثار و التسامح و العطاء و الحب و و و طبعا مش هاينفع إننا النهاردة فى جزء صغير من توبيك نتكلم عن اهمية ده .
و كذلك فيه نجاح عقلى و ذهنى و طبعا ده مرتبط بشدة بالأركان التانية برضه و هنا يا ترى كل واحد فينا بيقرأ قد إيه ؟ يا ترى بتحضر ندوات ؟ يا ترى بتشارك فى نقاشات مع ناس فعالين و أكثر منك خبرة و حكمة ؟ يا ترى بتغذى عقلك و لا لأ .

أما الركن الثانى :
2- الركن العملى :
و فيه نقطتين 1- المرتب . 2- السلوك .
1- المرتب :
يا ترى المرتب كافى و لا لأ ، يا ترى مقبول و لا لأ .. و ده طبعا ما يمنعش إنك تكون ليك أنشطة تطوعية .
2- السلوك :
و هنا لازم كل واحد يتعرف على شخصيته و على السلوكيات و القيم اللى فى الوظيفة بتاعته و هل هى متناسبة مع شخصيته .. على سبيل المثال :
هل انت من الناس اللى بيحبوا النشاط الحركى أوى و شخصيتك حماسية أكتر منها هادية ؟
لو كنت كده يبقى أكيد ما ينفعش تشتغل فى أعمال مكتبية لأنها مش مناسبة ليك و مش هاتستحملها إلا فى حالة واحدة و هى إنك تغير من شخصيتك ..
و لكن بديهى طبعا إنك ممكن تشتغل فى العلاقات العامة كويس أو فى حاجة نشطة أو مدرب تنمية موارد بشرية مثلا .
يعنى لازم تعرف هل السلوكيات اللى فى الوظيفة دى مناسباك و لا لأ .

و الركن الأخير هو
الركن الاجتماعى :
1- الاسرة . 2- العلاقات الاجتماعية .
و صدقونى بجد ليهم أهمية كبيرة و ما أظنش إنهم محتاجين توضيح .
بس هل انت فعال فى الاسرة ؟ يا ترى كام واحد فى مجتمعك هايزعل عليك أوى لو جرالك حاجة مثلا ؟

دى كانت الأركان التلاتة للنجاح .
و لازم كل واحد فينا يحط لنفسه رؤية لقدام و علشان نعمل ده تعالوا نشوف القصة دى مع بعض ..
بيقولوا إن كان فى راجل عجوز قابل ولد من الواعدين و سأله إنت نفسك تكون ايه لما تكبر ؟
قاله : أنا ؟
رد العجوز : آه انت .
قاله أنا نفسى أبقى دكتور كبير لابس البالطو الابيض و السماعة بتاعتى و جهاز قياس الضغط ، و كمان تبقى عندى مستشفى كبيرة و أكون أنا دكتور جراح .
قاله : طب و بعد ما تحقق هدفك ايه بقى اللى هاتعمله بالمستشفى و كونك تبقى دكتور ؟
رد الولد : أنا نفسى أعمل بحث علمى و كمان أكتشف دواء لمرض ما حدش عرف يعالج منه لسة و أعمل يوم فى المستشفى لعلاج الفقراء بالمجان أو أخصص جزء من المستشفى ليهم .

عارفين ايه كان رد العجوز ؟
قاله : انت كده عرفت رؤيتك و رسالتك
***
فى الحقيقة يا جماعة انا مش عارف القصة دى حقيقية و لا تخيلية و لكن المهم فيها هى العبرة أو الفكرة بتعبير أدق .

فالرؤية بتاعة الولد كانت هى المستشفى و إنه يكون لابس البالطو الأبيض
يعنى ببساطة هو شايف (رؤية) لنفسه فى المستقبل بإنه دكتور ناجح و صاحب مستشفى و عنده موظفين و دكاترة .
أما الرسالة فكانت هى الشىء اللى هايعمله عن طريق رؤيته .. و بالمناسبة احنا بنسمع الخطيب يوم الجمعة بيقول "أدى الأمانة و بلغ ......." و بلغ الرسالة يعنى كانت ايه بقى رسالة الرسول صلى الله عليه و سلم ؟
اسيبلك انت بقى الاجابة .
طب ايه الفرق بين رؤية عادية و رؤية ليها رسالة معينة ؟
الفرق يا جماعة هانلاقيه فى الثواب من ربنا و كمان فى النهضة اللى هاتحصل .. أنا سمعت إن ماليزيا أصبحت من الدول الصناعية عن طريق إنها بس اهتمت بالمشاريع متناهية الصغر ..خلينى أقولها كمان مرة : متناهية الصغر .

يعنى يا ترى لو جاتلك وظيفتين واحدة فى مصنع و التانية فى مصنع متخصص فى إعادة تصنيع المخلفات تختار أنهى ؟
صح هى دى اللى هاتختارها
لانها فيها رسالة

يبقى من دلوقتى بقى حدد رسالتك ايه و يا ترى رؤيتك ايه فى الحياة
و أخيرا و ليس آخرا حدد اهدافك ايه ؟
و دى بقى ليها موضوع مخصوص بيها
مستنى آراءكم و أفكاركم فى الموضوع ده خصوصا و إن فيه أفكار تانة كتييييييييييييير ممكن تطلع مننا احنا لما نفكر فيه بتأمل شوية

المادة السابقة مستوحاة من ندوة التنمية البشرية بالمنصورة للأستاذ أحمد قدوس الله بعنوان :
قوة الطاقة الكامنة و اكتشاف المهارات

و للحديث بقية إن شاء الله
حيث نتحدث إن شاء الله عن أهمية الأهداف و مواصفاتها و كيفية تحقيقها

تسلم ايدك يا عمر
وفى تقدم دايما يارب

midomaster كتب:

تسلم ايدك يا عمر
وفى تقدم دايما يارب

شكرا يا ميدو

HAZEM كتب:

تسلم ايدك عمر
موضوع في منتهي الجمال
بالتوفيق

شكرا يا حازم و إن شاء الله أنزل الموضوع الجاى قريب
احلم تعيش 3 : الأهداف