بسم الله الرحمن الرحيم
فخامة الرئيس :
تحيه طيبه ويعد .....
اعلم تماما ان سيادتك تحمل على عاتقك مهام جسيمه من اجل مستقبل افضل لأحفادنا ، كما اعلم ان ليس لدى سيادتكم الوقت الكافى لقراءة رساله من شخص مثلى .. مجرد مواطن عادى ابن مواطن عادى وساكن فى حى عادى .. وبركب مواصلات عادى
وبتشعبط فى الاتوبيسات عادى وبقف فى طابور العيش عادى وبتضرب على قفايا عادى ومبعترضش .
المهم هدخل فى الموضوع على طول عشان وقت سيادتكم الثمين .
انا ياريس من غير لف ولا دوران بصراحه كده بحبك .. بجد بحبك .. متستغربش .. وهكرهك ليه يعنى ؟؟ هو انت عمرك قصرت معانا فى حاجه .. ويعدين سيادتك عشرة عمر ، انا كل يوم بصطبح بصورة سيادتك على الصفحه الاولى فى الجرايد كلها .. لدرجة انى بقيت مغرم بيك وصورتك دايما فى بالى انا بعتبرك زى جدى ، اكيد حضرتك بتقول عليا رغاى دلوقتى انا اسف خلاص هخش فى الموضوع ...
انا مش باعت الرساله دى عشان اشتكى و اصرخ زى كل الشعب المطحون .. لا خالص مالص انا مش بتاع الكلام ده انا طول عمرى اعصابى جامده ، انا باعت الرساله دى عشان بحبك .. ايوه عشان بحبك هو سيادتك مش مصدقنى ليه .. يعنى مش متخيل ان فى حد فى الشعب بيحبك غير الحكومه، اعتبرنى مجنون انا بحبك بجد وعشان كده ببعتلك استفسر منك عن شوية مواضيع كده محدش هيفيدنى فيها غيرك وعشان خاطر ربنا ابعتلى الاجابه بسرعه قبل ما اتجنن اصل انا زى كتير اوى من الشعب عندنا شعره ساعه بتروح وساعتين تلاته تيجى عشان الزحمه مانت عارف فخامتك بنتعطل قد ايه واحنا فى انتظار مرور موكبك .
وعلى فكره لو عرفت تجاوب على اسئلتى صح يبقى بجد تستاهل حبى الكبير ليك وانا هبقى اكتر واحد فى الشعب بحبك وهدعمك وابايعك واغنيلك علشان كده احنا اختارنااك وممكن كمان اعملك جروب ع الفيس بوك (فخامة الزعيم لافرز) .
ندخل فى الجد بقى ونبدأ الاسئله عشان وقتك ....
ا- حضرتك تعرف كام واحد فى شعبك بينام من غير عشا ؟؟
ب- طيب تعرف كام واحد اتخرج ومش لاقى شغلانه يشتغلها ؟؟
ت – تعرف الفساد الادارى وصل لحد فين ؟؟
ث- تعرف فى كام مليون مصرى عايشين تحت خط الفقر ؟؟
ج- تعرف ان التعليم فاشل وبيتدهور كل سنه عن اللى قبلها ؟
ح – تعرف كام مليار جنيه بيتصرفوا على الحفلات والمؤتمرات والمهرجانات وماتشات الكوره والناس مش لاقيه تاكل ؟
خ – تعرف كام مريض بيموت بسبب الاهمال فى المستشفيات الحكوميه ؟
د- تعرف ازمة الاسكان وصلت لفين ؟؟ وكام اسره مش لاقيه مكان تعيش فيه ؟
ذ- تعرف ان فيه ناس عايشه فى العشوائيات فى عشش مع الكلاب والقطط ؟؟
ر- تعرف اللى عنده تلت او اربع اولاد وبياخد 200 جنيه فى الشهر بيصرف عليهم ازاى ؟؟
ز- تعرف كام واحد اقترضوا من البنوك من غير ضمانات مليارات الجنيهات وهربوا بره مصر؟؟ طب تعرف ترجعهم تانى ؟؟
س- تعرف فى كام مصرى غرق فى البحر وهو بيحاول يسافر بطريق غير شرعى اى دوله اوربيه عشان مش لاقى ياكل ؟؟
ش- تعرف الجهل فى مصر وصل لحد فين ؟؟
ص- تعرف كام مصرى بيحيك وكام مصرى بيكرهك ؟؟
ض- تعرف طيب انا ليه بعتلك الرساله دى ؟؟
اقولك انا عشان سيد الخلق محمد صلى الله عليه وسلم قال : "كلكم راع وكلكم مسئول عن رعيته، فالإمام راع ومسئول عن رعيته .... الى اخر الحديث " واحنا بقى من رعاياك يا ريس خلى بالك مننا شويه عشان نحبك بجد
سلام يا ريس .
تفتكروا انى الريس ممكن يرد علي الاسئلة دى ؟؟
____________
الإثنين سبتمبر 06, 2010 11:01 pm
