موضوعى انهارده عن صفات البنات المصريات
وربنا يسترها يا رب ويعدى اليوم ده على خير
علشان انا حاسه ان الموضوع ده بعده وقف
الصفه الاولى
اللسان
البنت المصريه ربنا واخد منها كل حاجه ومديها لسان زى الحربايه_ والعياز بالله_
لو فكرت انك تتريق على واحده اكيد مش هتسلم من لدغته _ يلا تستاهل_
وخاصه لو كانت عامله التحجيبه سبانش _ احذر من دول _
الصفه التانيه
التناكه
البت من دول تلاقيها مناخيرها فى السما _ على ايه يعنى _
ولو اضطرتك الظروف وولد اقرب جنبها لاى سبب من الاسباب حتى لو هى مش فى دماغه اصلا ولا واخد باله منها
تلاقى عرق التناكه نقح عليها وفاكراه عاوز يكلمها على اساس ان خلاص يعنى مفيش غيرها فى الدنيا
وتلاقيها بصتله بطرف عنيها كدا علشان متبينش اهتمام وتبعد خطوه صغيره اوى مبتغيرش مكانها اصلا
الصفه التالته
الشياكه
الشهاده لله يعنى احنا البنات دلوئتى بنهتم بنفسنا اوى
يعنى لو تفتكرى فى اول سنه فى الكليه البنت بتدخل وكأنها هتشوف عريسها
السنه دى وفى اول رمضان مع بدايه الدراسه قابلت واحده عندنا اعرفها
اسألها رايحه فين قالتلى رايحه اشترى ميكب
يا حاجه داحنا فى رمضان
بس بكره الكليه
اه اذا كان كدا معلش
طبعا كلكو فاكرين القصه بتاعه الست اللى كانت كل يوم تصحى تلاقى وشها غرقان ميه :
بس بالرغم من كدا علماء الاجتماع بيقولو ان الجيل الجديد هيغير الصوره دى للست المصريه
يعنى ممكن لو لاقدر الله اتجوزت تدخل تلاقى مراتك شبه البنى آدمين عادى
يعنى مش هتلاقى اريال طالع من دماغها ولا ريحه البصل مبهدله الدنيا
يمكن يا عم متتشائمش :
الصفه الرابعه
احتقار الرجل
متفهمش يا اخى الستات والبنات بيحتقرو الرجاله كدا متفهمش ليه
على اساس يعنى احنا ولاد ناس وهما ولاد .......................
ناس تانين ؟
بس العرق الفرعونى نقح عليا فى الايام اللى فاتت وافتكرت السبب
فى راجل رحاله من زمان اوى لاحظ سلوك الستات ده وارجعه لوقعه تاريخيه معروفه اوى
وهى حادثه خروج فرعون لمقابله سيدنا موسى
خرج فرعون مع ساده مصر فى وقتها
ومفضلش فى البيوت غير الستات والعبيد
وبعد هلاك فرعون واللى معاه بطبيعه الحال الستات اتجوزو من عبيدهم
وهوده السر
الصفه الخامسه
الاجتماعيه
البنت المصريه اجتماعيه بدرجه جيد جدا
فى ثانيه كدا تلاقيها رمت ودنها فى اى حوار ومتسيبوش الا ما تجيب اخره
وطبعا بأجتماعيتها دى بتعرف تجيب اطراف الموضوع من كل الناس
الوافى ميستر توفيق
الأربعاء أغسطس 18, 2010 7:56 pm
